Fabel Bahasa Lampung : Kisah Manuk jama Sekhuk Enton Mas (Cerita Ayam dan Jarum Emas)

Tabik puun...

Kali ini kami akan memberikan kembali cerita rakyat Indonesia, yang digubah dalam bahasa Lampung. Cerita ini berjudul Cerita Ayam dan Jarum Emas yang dalam bahasa Lampung berarti "Kisah Manuk jama Sekhuk Enton Mas". Mudah-mudahan bermanfaat untuk kita bersama. Aamiin...

Kisah Manuk jama Sekhuk Enton Mas

Alkisah di jaman tumbai dilom khimba, uwat binatang-binatang sai hukhik angkon muwakhi jejama, yakdolah Manuk Bakas jama bukhung Mayang. Tiyan khuwa hokhek khukun setulungan dilom segala hal, semisal nyapok mengan jejama.

Di pagi khani dilom khimba sai asuk, petikani tiyan khuwa lagi nyepok mengan, mak tisangka-sangka uwat sai Gemul makhah nyekhang khuwa binatang sina. Ulih tekanjat, Bukhung Mayang ngelumpat hambokh mit datas, manuk bakas nyelamatko dikhi tegakh. Gemul sai lagi kelapakhan, jak tundun pagun ngepealau manuk bakas sai lagi tegakh kekhabaian. Ngeliyak kejadian sina, mayang nulung khikni liwat kekuatanni goh nekhkom khik nyanik katan tundun khik hulu gemul. Ujungni, manuk bakas dacok lepasko dikhi khik langsung segok dibalik batu. Gemul mekik-mekik kesakik’an, sekhaya takhu ngepe’alau manuk bakas, langsung hebos malih nyempulat.

“Puakhi... luwah ‘tah lagi. Gemul jeno khadu malih jak dija”, cawa mayang jama manuk bakas.

“Tekhima kasih mayang, niku khadu nyelamatko nyak ji.” cawa

“Wat api puakhi? Acak niku keliak’an mak tenang? Niku makheng kodo?”

“Mak api-api, nyak je sihat. Dacok kodo nyak butanya jama niku?”

“Yu puakhi, api wih sai dapok nyak je tulung?”

“Kheji puakhi, nyak je bingung khepa cakhani niku dacok khambokh layung mit datas? Ki nyak je kok lumpat mak dacok. Ki tipekekh, kham khuwa sinji bukhung kenyin ‘kan?”

“Yu... sangun nyak tumbai goh gawoh mak dacok khambokh. Kidang puakhi, nyak ji uwat sekhok anjak enton mas, dipaya ki kusekhokko mit di kepi-kepi ji, badan ji kekhasa hampang dacok hambokh”

“Ki khena dacok kodo wih kuinjam pai sekhok anjak enton sa?”

“Yu mak api-api pakai gawoh, puakhi. Kidang wih niku musti ingok, ki niku khadu nyekhukko sekhok niku bujanji mak haga ngeinjam-injamko sekhok sinji jama sapa gawoh. Khek dang sampai lebon moneh da’!”

“Puakhiku, niku dang gusakh. Nyak pasti ngejaga bakhang sinji khek ngeolohko jama niku”

“Yu puakhi, ji sekhok kusekhahko diniku”

Bukhung mayang nyekhahko sekhok enton mas sina. Manuk bakas senang hati nekhimani. Sekhadu ngeniko sekhok enton mas, mayang nangguh mulang. Manuk bakas langsung nyekhukko kepi-kepi ni. Iya mak sabakhan. Makkung betik nyekhuk kepi ni, iya ngebokhko kepi ni mak kehingga khik langsung lumpat mit di kuta.

“Koo... koo... aak... koo... aak...” “ooiiii..... nyak dacok khambok” mekik manuk bakas hatang.

Manuk bakas lupa dikhi mak menyinko sekelilingni. Dibahni khadu uwat manuk bebai sai ampai mulang ngekhedik diya.

“Oi abang.... api pai gawimu? Khepa cekhita niku dacok khambok mit disan?”

Manuk bakas degah nunggai enggomni, “yu adek, nyak ganta khadu dacok khambokh ulih nyekhukko kepi-kepi ku pakai sekhok enton ji...”

“Wih lawi... dacok kodo bang adek injam sekhok sina?”

“Yu pakai gawoh... ki khadu nyekhuh, niku jajal lumpat mit sungiku jeno”

Manuk bebai begeluk ngejahit kepi-kepini, sekhaduni iya mekik-mekik pungah.

“Koo... koo... aak... koo... aak...” “ooiiii..... nyak dacok khambok moneh bang” timbal manuk bebai.

Lelakun manuk bebai sina gegoh gawoh manuk bakas jeno, lupa dikhi mak menyinko sekelilingni mekik-mekik. Tiyan khuwa mak kesipak ngewonko sekhok sai khadu tipakai.

“Dipa jengan adek ngetahko sekhok enton mas jeno?”, tanya manuk bakas.

“Jeno ku tahko didija abang, ditanoh sinji...,” timbal manuk bakas.

Manuk bakas jama manuk bebai ngesesepok sekhok sina disekeliling jenganan.

“Waduh lebon hinji sa, dek! Mak tihalu dipaya juga sekhok na sa...!”, timbal manuk bakas.

“Nyak ji khabai ki sekhok sina temon-temon do lebon! Khikku Mayang sai sekebuakni sekhok sina! Kham musti ngehaluko ni!”, tambah cawani manuk bakas kekhabaian.

Manuk bakas ngekhasa salah khadu ngelebonko bakhang kesayangan khik sai dianggop kuakhini. Uwat khasa sedih dihatini. Khadu bukhani-khani, khuwa manuk sina ngekokh-ngekokh cukutni di sekeliling tanoh. Khasa khabai ngejadi-jadi petika tiyan khuwa sina ngedengis suakha mayang hambokh anjak jawoh di pagi khani khuwa minggu sekhaduni, “Keliiiiiiikkkkkkk... keliiiiikkkkkk... keliiiiiiikkkkk...”

“Wah... khajin becong kuti khuwa khadu ngekokh-ngekokh tanoh hayu-hayu goh ji...”, cawa mayang.

“Khepa puakhi? Niku khadu dacok hambokh kodo?”, cawa mayang.

“Nyak hehanani dacok ngelumpat selayungni kuta begawoh. Nyak haga kilu mahap jama niku?”, timbal manuk bakas.

“Api hal ni niku sehayu-hayu hinji ngekekilu mahap jama nyak, puakhi?”, timbal mayang.

“Sekhok enton mas pengenian anjak niku sa lebon. Khadu beni sikam khuwa nyepok, kidang mak kehalu-halu...”, cawa manuk bakas kelemohan.

“Benokh sekali, abang Mayang! Nyak salah khadu ngelebonkoni”, timbal manuk bebai lumpat anjak batang balak sungi mekhomko manuk.

“Niku mak nukhut api timbalku! Niku khadu ingkakh janji, Manuk. Nyak jak ganta ji mak pekhcaya diniku! Nyak ngehakhap niku gawoh sai dacok khambokh, bang niku ngeajak kajong mu munih, mak haga angkonan lagi jama niku! Awas kuti!”, cawa mayang langsung khambokh ngelip mit langit, lebon mak keliyak lagi.

Mak beni jak sina, manuk bakas jama bebai kukhuk mit sakhang manuk. “Anak-anakku, dang medokh jawoh-jawoh. Geluk kukhuk mit dija jama bak emakmu sinji!”, cawa manuk bebai. Anak-anak manuk sina lamon si mak ngedegis jama kayunan emakni ulih jawoh puedokhni. Mangkung selesai ditengis kayunan emakni, khatong angin kencong khatong anjak langit.

“Emaakkkkk..... emaakkkkk.... tulung nyak makkkk..... sakik nyak mak....”, cawa anak Manuk.

“Anakku... anakku... lawi wih anakku tiakuk abang mayang...”, mekik manuk bebai jama manuk bakas.

“Dang akuk anak-anakku puakhi, tulung ampuni sikam”, timbal Manuk bakas.

“Kacau ki khadu goh ji. Ekhengko sanak-sanak mit di lamban kenyin, nyak haga ngesesepok sekhokni Mayang”, pekik Manuk bakas hatang.

Dilom pikha menit, khadu lamon anakni Manuk sai mati di tanoh ulih tihuntapko Mayang petikani hambokh jak datas langit.

“Ampun abang mayang... dang siksa sanak-sanak sinji... sikam sai tuha sai salah...”, pekik Manuk bebai miwang.

“Tengis cawaku betik-betik! Mulai jak ganta ji, nyak jama ketukhunanku haga selalu ngesesepok ketukhunanmu guwai suwa mengan sikam! Indaiko kuti cawa sinji!”, timbal Mayang mulang khambokh ngelip mit langit, mak moloh lagi.

“Kham khadu nyanik mayang makhah, adek. Kham musti tekhima kejadian sinji. Jak ganta kayunko sanak-sanak kham ngekekokh-kekokh tanoh, nyepok sekhok enton mas ni Mayang dalih nyepok mengan!”, cawa manuk bakas jama manuk bebai.

“Ya abang...”, timbal manuk bebai.

Ta Mim Sabdu Datas Tam Mim Ta Datas Mat.

Bumi Mayapada, Khani Selawi di Bulan Awal Tahun Khuwa Khibu Pitu Belas.