FONT "KHAD LAMPUNG" DI PC

Tabik puun…

Alhamdulillah hirobbil ‘alamin. Senang hati sikam dapok putungga moloh jama kutti khompok puun di dipa khiya sungi na. Dillom kesempatan hinji sikam haga ngebagi cutik “pedatong” sai buasal anjak Tamong Liman sai tihalu di debbah jan lamban tuha di pekon. Pedatong busalok kain handak sina ialah “Huruf (Font) Khad Lampung”. Khupa-khupa ni pedatong sa mak nunggal. Di datas kain handak sina wat tulisan lunik di bulung Cambai sai nyawako pedatong sa dapok tibagi ko jama-jama guwai tipakai dillom Komputer atau Laptop minak muakhi dipa pun sungi budiyom ni. Kenyin sikam mak kena tulah ke khua kali ni, jadi hinjilah pedatong anjak Tamong Liman sa.

UNDUH DIJA FONT KHAD LAMPUNG

Semakkung ni sikam ngusung pedatong sinji jama minak muakhi, kekhua debingi nimbi sikam khadu dianjau dillom hanipi jama Tamong Liman. Tamong sa cawa bahwa pedatong sinji layin pekhtama sekali luwah di “Dunia Maya-pakhda”, khadu lamon hulun sai dapok nyanik “pedatong- Huruf (Font) Khad Lampung” sejenis sai gegoh puakhi kham sinji :

1.      http://edukasi.kompasiana.com/2010/04/14/akasara-lampung-118550.html

2.      http://saliwanovanadiputra.blogspot.com/2011/12/aksara-lampung.html

3.      http://supriliwa.wordpress.com/aksara-lampung/

Tamong Liman cawa di sikam, iya ingok di buku sai khadu tibaca sai judul ni “Mengenal Adat Istiadat Sastra Dan Bahasa Lampung Pesisir Way Lima” sai titulis puakhi kham Sabaruddin SA di halaman 124. Dillom buku sina Khad Lampung sa gegoh sinji :

1. Dillom khad Lampung isi ni wat Kelabai Sukhat, Anak Sukhat, ditambah tanda-tanda ngebaca khad.  Jumlah huruf unyinni 20 buah sai ticawako Kelabai Khad atau Kelabai Sukhat (Induk Huruf-Indonesia) sai bunyi ni (…-a). Asal ni jumlah Kelabai Sukhat jenis ni wat 19 sampai 20 khad, tipakai sumang-sumang ngeliyak sungi wilayah pemakai ni. Ulih lamon ni pekhubahan zaman di Bumi Lampung sampai khani sinji, hani Tamong Liman jumlah kelabai sukhat sai tipakai ujung ni 20. Ki anak sukhat tipakai kenyin nulung Kelabai sukhat be-ubah bunyi (…-i, …-u, …-o, …-e, …-é, …ar, …an, …an, …aw, …ah, jama …ai). Kidang ki tanda baca tujuanni ngejelasko awal atau akhir anjak kalimat sina.
2. Ki kham haga nulis dillom khad Lampung mak gegoh kham nulis biasa. Khad Lampung mak ngenal huruf latin F, V, Q, Z sai diganti F khek V jadi P, Q jadi K, khik Z = J. 
3. Ki tulisan khad Lampung biasa ni dimulako jama tanda “Ngemula” dan diakhiri jama tanda “Bekhadu”.

Timbal ni Tamong Liman selanjutni cara makai pedatong Khad Lampung sa dapok tiliyak gegoh kheji :

Di ujung hanipi Tamong Liman nitip lohot jama sikam ngayunko kham jejama ngejaga budaya kham gegoh ngejaga badan tenggalan. Sambil lalang, Tamong malih ngelebon di hanipi sambil cawa “Dang Liyom Ngekhasa Kham Hinji Hulun Lampung”. Jadi khenapai da puakhi pedatong jama lohot anjak Tamong Liman khadu sikam sampaiko. Kantu jemoh sawai pedatong anjak Tamong Liman tikhasa kukhang, sikam kilu mahap ngalimpukha jama indai kanca seunyinni. 

                                                                                    
                                                                                        Dunia Maya-Pakhda, 7 Januari 2013