PANTUN LAMPUNG MANJAU DI WAKHUNG MENGAN?

  

Assalamu’alaikum Wr. Wb.

Tabik Puun….

Mianak muakhi indai kanca saunyinni, alhamdulillahhirobbil ‘alamin jejama kham ngeucakko khasa sokokh jama Allah SWT dipaya kham jejama dapok putungga moloh di “dunia mayapakhda” sinji dilom keadaaan sihat wal’afiat munyai mekhawan selalu.

Petika ngeliyak selembakh bacaan koran pagi anjak Lampung butetulis khani pakbelas bulan ketelu tahun khuwa khibu pakbelas sai buasal anjak salok’an ni mi uduk Mbok Pono pagi khani nambi, sikindua haga nyampaiko khibuan tekhimakasih guwai Pemekhintah Kota Bandakh Lampung utamane guwai Dinas Kebudayaan khek Pariwisata Kota Bandakh Lampung sai khadu ngenegiko Peraturan Perintah Walikota Nomor 19 Tahun 2011 sai ngeluahko pekhintah jama saunyinni masyakhakat Lampung khusus ni mianak muakhi kham sai ngedok Restoran atawa Rumah Makan di Kota Bandakh Lampung tikayun ngemutakh atawa ngebunyiko pantun/lagu Lampung di waktu tekhtentu, dilomni usaha budagang sua mengan sekhani-khani. Usulan khiya titah sina tisambuk moneh jama dukungan himpunan Majelis Punyimbang Adat Lampung (MPAL) sai ngedukung titah sina guwai tegakne budaya Lampung dang sampai haga tetok jak “tanoh Lada” sinji.

Guwai tegakni atukhan sina, khadu uwat usaha sai butetutuk jama atokhan sina gegoh “Sidak” (inspeksi mendakak = manjau guwai kecandat) sai lebih jak khuwa telu kali tiusahako jama Restoran atawa Rumah Makan (wakhung mengan) di kota Bandakh Lampung hani tulisan di koran sina. Sekhadu ngebaca tulisan di koran, uwat tanya balak anjak dikhi sikindua ji; dapok kodo ki atukhan sinji titutuk moneh jama Pemekhintah Kabupaten se-Lampung? Uwat kodo hulun sai mak khila ki atukhan sinji dipakai di saunyinni Kabupaten se-Lampung? Ki uwat khepa kelanjutanni? Khepa moneh ki jemoh sawai Peraturan Pemkhintah ji mak lagi tipakai?

Dilom ngetajawab tanya sina, sai paling awal sekali sikindua ji khila sekhta ngedukung nawaitu ni Pemekhintah Bandakh Lampung dilom usaha nyemukako budaya Lampung mit khompok khamik. Api sebab? Sebabni, sikindua tenggalan ngaku khadu uwat pungalaman sekhupa petika memenganan ki lagi di sabah pekon ngebunyiko pantun Lampung gegoh Peting gambus lampung, gitakh tunggal lampung, atawa pantun dangdut lampung ngekhasa bangik mengan. Istilahni mengan bukhasa sedop nihan ngekhesop dilom badan asingni suwa mengan makdok.    \\(‘0’)//

Sikindua pikekh ki ngebunyiko pantun Lampung (semisal pantun Lampung sai klasik atawa dangdut) dilom waktu-waktu santai di sungi wakhung mengan, dapok nyanik suasana petikani mengan bubida anjak suasana mengan sai bakhihni di luwah sungi Lampung. Lebih-lebih ki sungi wakhung mengan kemayangan ngedok lamon tetempelan hiasan sai jadi cikhi jak adat lampung. Dilom hal sinji dapok jadi mengan ialah usaha ngecukupko kebutuhan badan, ki lagu atawa pantun jadi usaha ngecukupko kebutuhan jiwa. Moloh luwot mit di pantun Lampung sai tibunyiko jeno, kantu uwat hulun jawoh (asli jak luah provinsi Lampung) singgah mit di Lampung, usaha sina jadi awal cakha ngenalko hulun jama Lampung. Hulun dapok jadi butanya api hudi Lampung, api gawoh sai uwat dilom Lampung anjak seni-ni, bahasa-ni, sampai dapok jadi tabiat hulun lampung tenggalan. Atawa jemoh sawai anjak usaha sinji lamon hulun sai demon jama Lampung andahni Pantun Lampung. Akhirni ki titinuk jak nawaitu ni sinji dapok ticawako mansa.

Nah ki ganta, dapok kodo ki atukhan sinji titutuk moneh jama Pemekhintah Kabupaten se-Lampung? Khasani makdok sai mak mungkin, ki kham buniyat ikhlas khila hati ngedukung usaha sina. Dilom hal sinji sai buwewenang lebih ialah Pemekhintah masing-masing Kabupaten/ Kota se-Lampung sai ngeluahko Peraturan Daerah. Usaha sinji jadi kunci titah kayunan Pemekhintah Kabupaten/Kota masing-masing ngenalko budaya Lampung. Sangun mak dapok tipongkekhi halok uwat kejadian diawalni ganta atawa jemoh sawai lamon hulun mak sepakat jama pekhintah sinji.  Kham jejama pandai sekhta jawoh-jawoh khani dapok maklum alasan sina ulih provinsi Lampung tenggalan ganta ji mak lagi anjak suku Lampung gawoh, kidang khadu laom suku/adat se-Indonesia dapok kham tunggai di Lampung gegoh Jawa, Sunda, Padang, Palembang, khek sai bakhihni. Dilom budayani suku/adat hulun sina ngedok sungi wakhung mengan cikhi khasni budaya masing-masing gegoh RM Tegal cikhini Jawa, RM 2 Saudara cikhini Padang, RM Ampera cikhini Palembang, atawa RM bucikhi khas sunda. Saunyinni uwat kepentingan sai gegoh yakni nyanik hulun sai singgah dapok tisanik senang dilom memenganan sesuai cikhi khas masing-masing etnis. Uwat moneh wakhung mengan modern (cepat saji: geluk sanik) kham tunggai dilingkungan tenggalan gegoh KFC, CFC, Pizzahut, khek bakhihni sai nyanik senang tetamu pakai pantun anjak Pop Indonesia atawa Pantuni hulun anjak Barat. Kantu sinjilah tantangan dilom sesanik’an Peraturan Daerah di masing-masing sungi. Ulih sebab sina, sesanik’an Peraturan Daerah sai ngebunyiko pantun Lampung di sungi wakhung mengan sai ngetetutuk Bandakh Lampung helauni “mak maksa~fleksibel” nihan jama sistem manageman penyajian sungi usaha wakhung mengan. Sai lebih helauni lagi, lapah kham jejama budu’a jama Allah SWT kekalau sekebuwak sungi atawa sistem manageman sungi wakhung mengan dapok tikeni sadakh tenggalan haga munyintai budaya kham Lampung di tanoh Lampung ni tenggalan, kipak ya tenggalan lain jak etnis Lampung. Ujungni gemoh sawai kham jejama dapok ngekhasa hasil liwat usaha pelestakhian budaya Lampung di wakhung mengan sekhta ngenulung ngeni pilihan cakha publikasi fasiltas di sungi wakhung mengan di Lampung. Duit mansa, Budaya tekhasa.

Akhirni, kantu kham jejama hulun Lampung khek bakhini dapok ngenulung usaha sina liwat du’a khiya moneh nge-awasi PP di Bandakh Lampung. Khepa moneh ki jemoh sawai PP ji mak lagi tipakai? Kekalau du’a kham dapok lebih tojok mena jak ki PP sai mak tipakai lahi.

                                                                                                                         

Wasslamu‘alaikum. Wr. Wb.

                                                                                    Kedaloman

                                                                                    Khani Telung Puluh dilom Bulan Ketelu

Tahun Khuwa Khibu Pakbelas.