“Zaman mak kenal kanan kikhi
Hulun lapah laju ngekhubah sungi
Khepa budaya haga lestakhi
Ki niat kham mak butegi”
Tabik puun.
Alhamdulillah hirobbil‘alamin, jejama kham besokokh jama Allah SWT sai
khadu ngeni kemudahan khek kesihatan atas Rahmat khek Kekhilaan-Ni. Khasa-khasa
ni kham dapok ngekhasako cecutik dampak asimilasi dilom hokhik bujejama. Api
maksudni Asimilasi? Asimilasi dapok ticawako bentuk pencampokhan budaya-budaya dipaya
dapok nyanik pekhubahan anjak budaya awal sai buasal jak budaya sai khamik.
Kham jejama
pandai bahwa simbol Lampung ialah Sai Bumi Khua Jukhai. Dapok ticawako tanoh
Lampung ji disusun anjak lamon hulun khek suku bangsa didelomni, yakni Lampung,
Jawa, Sunda, Bali, Palembang, khek sai bakhih ni. Ulih lamonni kebudayaan dilom
kehokhek’an sina mak dapok dipongkekhi ngeni pengaruh, cecutikni budaya sapa
sai lamon lebih-lebih kuat dapok ngeni lamon pengaruh jama budaya bakhihni. Lajuni
dilom hokhek pujejama mak dapok kham nyawako budaya anjak sai helau atau
sebakhihni bukhak, ulih dilom budaya prinsipni buasal anjak kepekhcayaan khek pola
kehokhek’an sai dianut bida-bida tekhgantung hulun sai makaini.
Ulih kham
jejama hokhek di tanoh Lampung, mak betik kiya kham jejama mak ngenal budaya
Lampung tenggalan. Dilom kesempatan sinji sikam haga cecutik bucekhita (ngolohko engok’an kham jejama) jama sai
gelakhni pantun atau gelakh bakhihni sesimbatan/ adi-adi. Lamon hulun bukicik
adi-adi sinji ialah pantun sai biasani tipakai di wilayah Sumatera ulih
pengaruh anjak budaya Melayu. Sumangni pantun di Lampung bahasa sai tipakai
diganti bahasa Lampung dipaya khetti khiya maksudni nyesuaiko jama cakha
bukicik hulun Lampung. Pola bunyi ni tetop A – B – A – B dipaya khuwa bait
pekhtama kumbangni khuwa bait kekhua isi ni. Ki maksud khiya khetti ni
nyesuaiko jama kehaga’an anjak sekebuwak sai nyanik anjak pantun sina. Kenyin
kham jejama pandai, sikam nyanikko kumpulan pantun lampung sinji dilom Media
Flash. Hakhapan sa kenyin lebih mudah, praktis, khek nyesuaiko jama kemajuan
jama.
Mahap
ngalimpukha jama kutti khompok indai kanca seunyinni, kantu dilom sajian sikam
sinji tikhasa kukhang benokh atau mak sesuai jama aslini, ulih sikam ampai
pandai sia dalih tetawaian bulajakh. Kantu wat salah dilom sajian sinji sikam
khila dikritik khek sedia tikhalisko. Kekalau jemoh sawai kham dapok jejama
paham khek jejama mak liyom-liyom makai pantun dilom hukhik sekhani-khani.
Aamin.
“Togok Dija
Istilah
Istilah Ni Kelama
Sambut Ucak Hamdalah
Wassalam Antak Dija.”
Kedaloman Raya, 19 Januari 2013
ADI-ADI, PANTUN LAMPUNG
Reviewed by m
on
11:29 AM
Rating:
No comments: