KALENDER 2013 Versi Khad Lampung

Tabik puun....

Petika dabingi semangkung pedom di bulan penghujung tahun khua khibu khuabelas, induh api wat si ngebako wewah mata mak dapok pedom. Khupa ni “kelakh” mata hinji sa mak dapok pedom anjak ngeliyak siaran TV lokal daerah Lampung dipaya wat muli “presenter” lagi ngekhikin acara-acara di akhir tahun jama khagah ngukha sai ahli keuangan anjak Jakarta. Dilom acara sina wat timbal ni ahli keuangan si dapok kham jejama akuk guai pelajakhan “....... detik buganti menit, menit buganti jam. Jam lapah tekhus ngeganti khani, khani laju ngeganti minggu laju luwah ni bulan, ketutuk bulan buganti Tahun. Khuabelas buganti telubelas khetti ni zaman khadu buganti, api sai khadu kham tinggal ko jama khompok sai khamik?”.

Jemoh ni anggakhan jam setengah siwa di lom warnet (warung internet), luwah niat dilom dikhi haga nyanik kalender sani’an tenggalan anjak internet. Selang pikha menit anjak mejong, wat pekekhan khepa cakha ni nyanik kalender (almanak – ki khani tuyuk tamong di pekon) kidang pakai khad Lampung. Alhamdulillah, selang pikha khani jak hena wat hasil ni gegoh hinji.

UNDUH DIJA ALMANAK KHAD LAMPUNG SA

Almanak di datas sebenokh ni gegoh jama kalender biasa atau umum di lamban-lamban anjak tanggal 1 togok mid 30 atau 31 dillom sebulan ni. Sikam hana ni ngeganti huruf khek bilangan dillom khad Lampung. Khad lampung sai tipakai tiakuk anjak buku LKS SMP Muatan Lokal Kelas I Tahun 2003. Di debah tanggal nasional sina wat tanggalan tahun akhab sai biasa dipakai jama tuyuk tamong kham sebagai buah anjak agama islam sai dipegung jama hulun Lampung. Ki minak muakhi tungga jama tanggalan sai suluh, tanda ni khani sina libur nyesuaiko jama ketetapan khani libur nasional. Kantu jemoh sawau wat pekhubahan ketetopan anjak Pemekhintah Indonesia sikam kilu mahap.

Terakhir sikam ngekilu mahap jama mianak muakhi dipa pun jengan ni sai mungkin tersinggung jama tulisan atau guwayan sikam nyanik almanak dilom khad Lampung sinji. Ulih semata-mata sikam buniyat nyanik tulisan atau guwayan sinji adalah “hiburan” khepa cakha ni budaya Lampung kham hinji dapok dikenal hulun khamik, kenyin anak umpu kham dapok kenal Lampung lebih jawoh lagi, sokokh ki lebih helau anjak zaman kham ganta. Mudah-mudahan Allah SWT ngabulko du’a kham sinji. Aamin.

Salam Kemuakhian Lampung. (^_^)