KUMBANG BUINDA SAI HELAU

Langit mulai buganti wakhna jadi suluh-kuning kehaloman. Suakha hatang makhbut bulagu helau azan Manggkhep sayup-sayup mak lagi ketengis. Goh ngekheti tenggalan, khompok di Pekon Dunia Maya-pakhda tuha mukha ni kukhuk dilom lamban. Cecutik’an pekon tuha jak suku Lampung sina bekhubah hiyon. Sai khamik kiya ne khatong jak mesigit sai dipenggekh way balak, sungi khagah-khagah pekon sembahyang jejama ngehadap Allah SWT. Mesigit handak buhatok genteng sai mak hanyuk jak banjekh balak di Way Khumakha Balak khuwa tahun liwat, disayangi jama uyinne hulun. Buktianne hulun pekon khamik nutuk pengajian mingguan, pengajian PHBI (Peringatan Hari Besar Islam), lebih-lebih ki sembahyang lima waktu ne.

Telu puluh menit bukhadu. Wakhna helau sai dapok titinuk jeno lebon, langit bekhubah agak kelom akhir ne. Khagah buhinjang buketupung luwah sai-sai jak khangok mesigit. Uwat moneh sai luwah bujejama, bucekhita sekejungne khang-khang mulang mit lamban masing-masing. Uwat moneh tidengis lalang hatang jak sai khuwa jakhma bucekhita sina. dilom lapahan sina, uwat sai jama’ah sai khadu togok mit di depan lamban ni. Khagah bubadan balak agak tambun jeno, keliyak jak jawoh mulai cecakak’an bupapatan di jan lamban panggung. Petika ne bebukak khangok jan, uwat suakha agak biyak hatang muncul jak biding sesai kayu lamban. “Assalamu’alaikum, sehat mong?”

Khagah balak sina tedegak tekanjat. Kidang mak beni jak hudi luwah senyum handak penanda iya agak paham sapa sai butamu di lamban ne.

“Wa’alaikumsalam, alhamdulillah mong sehat badan munyai mekhawan. Cak takhu diluwah tenggalanan, beno niku masuk angin. Lapah kukhuk mit dilom” timbal Tamong Liman dilajuko busalaman jama tamu sina.

Jak luwah lamban, kekhatongan tamu jeno nyanik sai sumang di lamban Tamong sinji. Sukha cekikik’an lalang dibulup khasa kemuwakhian dapok panjak titengis jak lamban sai biasa ne hiyon ditinggal sekebuwak duma petika dawah ne. Kadang-kadang tidengis moneh suakha panjang khek gelas, gegoh tehantuk dilom lamban bagian juyu disusul hasok apui ngegebul liwat lubang genteng datas lamban. Mak tikhasa-khasa sejam moneh khuwa khagah sina lalang waya bucekhita, gegoh mak peduli keadaan keliling lamban.

“Seunyinne sai uwat di nyak ji khadu mak lagi ngedok. Mak’dok hakhap ne lagi”, timbal khagah sai butamu sina. “Hokhek ne badan ji ganta goh dabingi kelom. Khadu mak kenal sapa dikhi sinji”.

Suasana geluk bekhubah. Mak lagi tidengis lalang hatang jak khuwa khagah jeno. Tamon Liman nutuk pehaman. Iya nutuk ngekhasa liwih anjak keadaan sai ditekhima khek tumbai ne. Khek tumbai sai nutuk ngebasmi VOC sai khatong haga ngejajah Kekhajaan Junjungan Nguyun Kuyun. Khek tumbai sai bekhani ngelawan bajak lawok di Lawok Pesesekh, dilom telu khani hehana busenjata payan jama hinjang kebat. Khek tumbai sai dititah Khaja Banten liwat hanipine, ngebelah way Ci Bodas jadi khuwa, Ci Bodas Balak jama Ci Bodas Lunik sai laju ne jadi sirik kekhajaan bakheh. Khek tumbai sai dikenal hulun liwat adok Lemaung Khimba Panji Siwa.

Mak beni jak hena Tamong Liman minjak jak mejong sila dihadapan Lemaung Khimba. Khagah sai tikenal holon uwat kesaktian bupantun, ngelelucu, khek didemonko jama khompok di pekon ne senyum pusesengih. “Sai khadu gelakh ne khadu, mong. Dang dibabidi lagi. Lapah jejama kham sepok hakal ne” cawa Tamong dakak-dakak ngajak khagah sina mit kelasa dilom.

            Tamong laju ngakuk kekhtas khek botol dawat jama khuwa kuwas ne jak datas lemakhi. Mak beni ne, ngegakhis khalis jak datas mit dibah pas titatengah ne kekhtas handak kekuningan sina. Beliawan sai hani khompok Pekon Dunia Mayapakhda lagi mukha pagun putungga jama Khadin Intan II ngayunko khagah tamu sai buhinjang halom sina nulis api gawoh sai khadu mak lagi dilom hokhek ne di belah kikhi, khek api-api gawoh sai lagi nyisa di belah kanan kekhtas.

            “Kham cuba mak usah nulis pai sai di belah kanan, injuk ne khadu bela kenyin” timbal Lemaung Khimba.

            “Kapan niku haga nyekhaiko kajongmu?” cawa ne Tamong Liman.

            “Api pai maksudmu mong? Nyak mak mungkin ngelepasko kajongku. Iya demon jama nyak, nyak moneh demon jama iya!” timbal Lemaung Khimba degok.

            “Ya khadu ki khena, helau kheti ne,” timbal Tamong Liman agak semangat.

            “Ganta catat hena jadi nomokh awal di belah kanan “Kajong sayang di Nyak”. Nah, ganta kapan niku haga nyekhahko anakmu tenggalan mit musuh-musuhmu?”

            “Niku ‘ji aneh mong, mak ngedok anakko sai haga tikeniko jama musuh-musuhko!”, timbal Lemaung Halom lebih degok.

            “Ya khadu, helau khetine! Hudi pakai nomokh kekhuwa dibelah kanan “Sanak mak ngedeok di sungi musuh” cawa Tamong Liman nuliskonni di kekhtas jeno. “Ganta kapan niku haga luwah jak Islam?”

            “Ya jelas nyak mak haga. Hokhek matiku di Islam, pakaine Islam selama ne. Dunia khek seisine mak dapok ngeganti balak ne nilai islam dihatiku!”

            “Ki khena kham tulis “Islam pakai hokhek jama matiku” di belah kanan” cawa Tamong Liman pakai khad Lampung. Tekhus jak hena, uwat tanyaan-tanyaan sekhupa sai tiguwai khuwa khagah sina, sai akhir ni Lemaung Khimba nangkap maksud jak Tamong Liman. Agine sadakh jama kelucuan ne, Lemaung Khimba lalang tisusul lalang hatang busawut jak Tamong Liman.

            “Lucu da khettine dikhi ji, Mong. Kheppa unyinni sai uwat dibadan mak kekhasa sama sekali. Padahal sai uwat dibadan lebih balak manfaatni jak ki bakhehni. Hulun cawa sai A hudi dapok ngebako kham hebat, sai B dapok ngebako kham senang. Kidang ki jak badan tenggalan mak senang api guna ne unyin ne”, timbal khagah sai nalom pencak khakot Lampung sina jama Tamong Liman.

            “Nah, niku khadu pandai kan. Api sai kham kekhjako ki awalne buinda sai helau tilah beno nunyai hasil sai helau. Khiya moneh ki buinda sai bukhak mena tilah buhasil bukhak. Bukilu jama Allah Swt Tuhan Sai Maha Kuasa, kekalau kham jejama dikeni sabakh dan ikhlas guwai hokhek kham mudah sekhta bekhkah. Nah, ganta lapah kham benyulu guwai sembahyang Isya bujama’ah, hena suakha makhbut khadu kedengisan” timbal Tamong Liman mulai cecok.

            “Nah payu, lapah!” timbal Lemaung Khimba senyum. 

"LAMON ULUN MAK NGEKHASA PAHAM JAMA DIKHINI TENGGALAN"

 

Dunia Maya-pakhda, Khani Pekhtama Bulan Kekhuwa Tahun Khuwa Khibu Pak Belas